દેશની સર્વોચ્ચ અદાલત (Supreme Court of India) દ્વારા પોતાના કામકાજના શિડ્યુલમાં એક મહત્વનો ફેરફાર કરવામાં આવ્યો છે. સુપ્રીમ કોર્ટે 27 ઓગસ્ટ (ગુરુવાર) ના રોજ અદાલત અને તેની રજિસ્ટ્રી (Registry) માટે વિશેષ રજા જાહેર કરી છે. જોકે, આ રજાના બદલામાં 22 ઓગસ્ટ (શનિવાર) ના રોજ સુપ્રીમ કોર્ટ અને તેની રજિસ્ટ્રીમાં પૂરા દિવસ (Full Working Day) માટે કામકાજ ચાલુ રહેશે.
વકીલોની સંસ્થાની માંગણી બાદ ‘ફૂલ કોર્ટ’ (Full Court) દ્વારા આ નિર્ણય લેવામાં આવ્યો છે. જે અંગે સુપ્રીમ કોર્ટની એડમિનિસ્ટ્રેટિવ જનરલ બ્રાન્ચ દ્વારા એક અધિકૃત સરક્યુલર (Circular) પણ બહાર પાડવામાં આવ્યો છે.
કેવી રીતે લેવાયો આ નિર્ણય?
મળતી માહિતી મુજબ, ‘સુપ્રીમ કોર્ટ એડવોકેટ્સ-ઓન-રેકોર્ડ એસોસિએશન’ (SCAORA) દ્વારા 27 ઓગસ્ટે રજા જાહેર કરવા માટે વિનંતી કરવામાં આવી હતી. આ વિનંતીનો સ્વીકાર કરીને સર્વોચ્ચ અદાલતના તમામ ન્યાયાધીશોની ‘ફૂલ કોર્ટ’ બેઠકમાં 27 ઓગસ્ટ 2026ના રોજ રજા મંજૂર કરવામાં આવી હતી.
સરક્યુલરમાં સ્પષ્ટ જણાવાયું છે કે:
“SCAORA ની વિનંતીને ધ્યાનમાં રાખીને ફૂલ કોર્ટે 27 ઓગસ્ટ (ગુરુવાર)ના રોજ માસિક કોર્ટ અને રજિસ્ટ્રી માટે રજા જાહેર કરી છે. પરંતુ, તેના બદલામાં 22 ઓગસ્ટ (શનિવાર)ના રોજ સુપ્રીમ કોર્ટ સંપૂર્ણપણે કાર્યરત રહેશે અને રજિસ્ટ્રી ઓફિસો સાંજે 5:00 વાગ્યા સુધી ખુલ્લી રહેશે.”
સુપ્રીમ કોર્ટમાં સતત 3 દિવસનું વેકેશન
સુપ્રીમ કોર્ટના વર્ષ 2026ના અધિકૃત કેલેન્ડર મુજબ આ અઠવાડિયે તહેવારોની હારમાળા છે:
26 ઓગસ્ટ (બુધવાર): ઈદ-એ-મિલાદ (Milad-un-Nabi) ની અગાઉથી નક્કી થયેલી રજા.
27 ઓગસ્ટ (ગુરુવાર): SCAORA ની માંગ પર જાહેર કરાયેલી નવી રજા.
28 ઓગસ્ટ (શુક્રવાર): રક્ષાબંધન (Raksha Bandhan) ની અગાઉથી નક્કી થયેલી રજા.
આ નવા ફેરફારને કારણે સુપ્રીમ કોર્ટ અને તેની રજિસ્ટ્રીમાં 26 ઓગસ્ટથી 28 ઓગસ્ટ સુધી સતત 3 દિવસ સુધી ન્યાયિક કામકાજ અને ફિઝિકલ ફાઈલિંગ બંધ રહેશે. જોકે, શનિવાર (22 ઓગસ્ટ) ના રોજ આ વધારાના દિવસનું કામકાજ પૂરું કરવામાં આવશે.
શું ખુલ્લું રહેશે અને શું બંધ?
આ આદેશને લઈને નાગરિકોમાં કોઈ દ્વિધા ન રહે તે માટે સ્પષ્ટતા કરવી જરૂરી છે કે આ રજા માત્ર સુપ્રીમ કોર્ટ અને તેની રજિસ્ટ્રી માટે જ સીમિત છે. આ કોઈ દેશવ્યાપી જાહેર રજા (National Public Holiday) નથી. આ આદેશની અસર દેશની બેંકિંગ વ્યવસ્થા, શેરબજાર (NSE/BSE), તેમજ ખાનગી અને સામાન્ય સરકારી ઓફિસો પર પડશે નહીં અને તે તમામ રાબેતા મુજબ ચાલુ રહેશે. આ ઉપરાંત, દેશની અન્ય હાઈકોર્ટો, નીચલી અદાલતો, શાળાઓ અને કોલેજો પોતાના સ્થાનિક કેલેન્ડર અને નિયમિત શિડ્યુલ મુજબ જ કાર્યરત રહેશે. માત્ર સુપ્રીમ કોર્ટ અને તેની રજિસ્ટ્રી 26 થી 28 ઓગસ્ટ દરમિયાન બંધ રહેશે, જેની ભરપાઈ કરવા માટે 22 ઓગસ્ટના શનિવારે પૂરા દિવસનું કામકાજ રાખવામાં આવ્યું છે.
આ પણ વાંચો : શું તમે પણ ફેટ્સ ખાવાથી ડરો છો? જાણો હૃદયને મજબૂત બનાવતા 7 ‘ગુડ ફેટ્સ’ અને કાર્ડિયોલોજિસ્ટની વિશેષ સલાહ
અરજદારો અને વકીલો માટે અગત્યની નોંધ
જે વકીલો અથવા કેસ સંબંધિત અરજદારો (Litigants) 26 થી 28 ઓગસ્ટ દરમિયાન સુપ્રીમ કોર્ટની રજિસ્ટ્રીમાં ડોક્યુમેન્ટ ફાઈલિંગ કે અન્ય વહીવટી કામકાજ માટે આવવાનું આયોજન કરી રહ્યા હોય, તેમણે આ સુધારેલા સમયપત્રક નોંધ લેવી. ફિઝિકલ ફાઈલિંગ અથવા રજિસ્ટ્રીના કામકાજ માટે 22 ઓગસ્ટ (શનિવાર) સાંજે 5:00 વાગ્યા સુધીનો ઉપયોગ કરી શકાશે.